足球 vs 抗爭

今晚係2014世界盃分組賽西班牙大戰荷蘭，同時又係立法會守護東北嘅抗爭時刻。兩邊同時現場直播，不難另筆者想起兩者嘅關係。

在場和平靜坐嘅村民、學生同示威者，其實係採取緊足球嘅穩守突擊，找一個機會進入會議廳，申訴佢哋對東北發展嘅要求，希望規劃下馬，不過隨時守足成場。另一方面，喺立法會內「拉布」嘅議員則使用「拖字決」，拖到完場，令對家暫時贏唔到，但係最多都係打個和，最後都會擇日再戰。另一邊廂嘅「勇武」本土派「熱狗」就決定硬闖，以技術性犯規阻止對方進攻，但打「擦邊球」就好容易俾人紅牌趕出場，冇得再玩。

明眼人一睇就睇得出，無論邊一招都係冇可能贏到嘅，因為本身場賽事就唔公平。就算有人出到司法覆核，向球證投訴都冇用，係人都知球證、旁證、足協、足總丶足委都係佢嘅人，點樣同佢鬥？

係咪咁就冇得鬥？咁又未必～重有觀眾嘛，觀眾嘅眼睛係雪亮嘅，只要令佢哋明白大家爭取緊嘅係咩，將佢哋變成「Fans」，相信公道自在民心，人民嘅力量一定可以改變政府喺東北嘅規劃。雖然今晚西班牙飲恨，但痛定思痛，又唔係冇機會出線嘅～