煙花下的民間疾苦（網上借圖）
身邊有朋友話，好地地有日假期唔抖下，好地地又有煙花唔睇，好地地一個家庭日唔陪下屋企人，好地地有設計唔做玩惡搞，好地地有飯唔食食胡椒，好地地有冷氣唔歎走去曬太陽，好地地有廣東道唔行走去行軒尼詩道，好地地的維園足球埸冇得踢波，好地地三個地鐵站距離要行成六個幾鐘，所有嘢都好地地，點解要去遊行呢？
如果咁多好地地，香港人重去上街控訴，只有兩個原因，就係香港人傻咗，如果唔係，會唔會係其實唔係咁好地地呢？點解生存斗志旺盛的老人唔可以好地地咁安享晚年而要被自殺，點解一個特首唔可以好地地咁做好佢份工而要貪小便宜？點解一個記者唔可以好地地咁問一個香港人一直想問的問題而要被拉入後巷？點解學生唔可以好地地獨立判斷而要被洗腦？點解創作人唔可以好地地自由創作而要隨時被檢控？點解當權者唔可以好地地聆聽香港人的聲音而要滅聲？點解基層唔可以好地地咁生活而要忍受高通漲？點解小商店唔可以好地地咁經營而要被大財圑壟斷？點解政府唔可以好地地建設香港而要官商勾結？點解高官不能好地地為官清廉而偏要僭建騙津貼？點解咁多點解都叫好地地？表面的好地地才是最可怕，溫水煮蛙，慢慢沒殺創作，續步消滅思想，然後不斷剝削。好地地做一個正直不柯的人，本來就是正常不過的事，是作為人類最基本的要求，為什麼會說是巿民的期望提高了呢？就算提高了，也不成為犯錯的理由吧?到底這十五年來，香港有那一件事真真正正值得放煙花呢？
沒有留言:
張貼留言